【臭B二三事＃6】百幾個睡姿，生左仔先知！

阿仔有自己張床仔，同大人床相連，往來無阻隔。

平時點樣喺自己床仔玩都好，一到瞓覺時間，小朋友總有百幾個理由爬返去大人床。

由一歲大小同床開始，我地一家三口好似冇乜點用正常姿勢瞓過覺：為左避開自由瞓覺，碌嚟碌去嘅大帝，我地有時一家人打横瞓，有時倒轉頭瞓。每日瞓醒，都喺唔同位置搵到阿仔，有時去左我地中間，有時喺我地腳底，有時好似馬戲表演咁，發現佢喺床沿邊，在跌與未跌之間安睡。

最悲慘一次，係畀一陣餲味催醒，睜開眼就見到一個包住尿布嘅 pat pat 喺我頭頂。

想唔想阿仔習慣自己瞓呢？係想佢獨立啲嘅。

但也不捨每朝摸到腳仔手仔面珠 dun 喺枕旁嘅親密時光，老公成日都提住：男仔黐阿媽，最多十年。

三年幾前生左呢個調皮仔，得到一個全世界最迷戀我嘅男子，呢種媽媽嘅滿足同珍惜，老公點會明。

小朋友開始想有自己的房間、願意瞓係床仔、自己著衫唔畀父母幫手，每一日，逐步邁向獨立。

十年之後，當佢嘅世界大到唔淨止父母時，會唔會留住一段喺被竇入面暖笠笠、軟綿綿嘅記憶呢？

圖 / 文：二花

【作者小檔案】

二花：一個鍾意畫畫寫寫搵野忙的媽媽、家務廚藝極需改善的主婦

文字和圖像獲 一個個 Onegogo授權刊登，請勿自行轉載。