【臭B二三事#7】一二三四五六七，唔寫原因得唔得？

本身就係論論盡盡嘅人，生左仔之後情況更嚴重，出門裙拉褲甩，漏野再攞過係必然戲碼。

小朋友返學後，每日朝早屋企氣氛十分緊張，大呼小叫嘅情景日日發生。

為嘅，就係準時到學校‧‧‧‧‧‧

每日喺校門迎接學生嘅副校長同主任好快就叫得出阿仔嗰名，其他家長可能會開心，但阿媽就好心虛：阿仔差唔多係每日最尾嗰幾個到校學生，日日見到我哋死衝爛衝過馬路返學校，唔認得至奇‧‧‧‧‧‧

無論幾早起身，大爺都有辦法磨到最後一分鐘先走。遲到原因由作息不好到哭鬧，到最新嘅「出門前要大便」，阿媽已經寫到面皮都厚晒，雖然瘀，但都係真的呀！

每日返學，阿媽如果見到前方有相同校服嘅小朋友同家長，就會安心啲；送完仔見到仲有其他學生趕緊返學，又會好衰咁覺得安慰。

有時我地係人地嘅安慰，有時人地安慰我地，冇話邊個最叻。

湊仔，就係咁樣吧？
 

 
圖 / 文：二花

【作者小檔案】

二花：一個鍾意畫畫寫寫搵野忙的媽媽、家務廚藝極需改善的主婦

文字和圖像獲 一個個Onegogo 授權刊登，請勿自行轉載。