Home / BB101 / 【臭B二三事#8】帶著長老去旅行

【臭B二三事#8】帶著長老去旅行

一直很佩服婚後和長老同住的人。

二花

無論大家幾咁好相與,彼此生活習慣不同,在同一屋簷下,摩擦於每一天相處中累積,小漣漪總有機會聚成大波浪。有左小朋友,關於教養的爭拗有增無減,只是和長老出遊數天,已領會同住之苦。

爸爸媽媽希望孩子有自理能力,鼓勵小朋友有探索的勇氣,在長老眼中,係自找麻煩和接近危險之舉。平時閂埋門教仔,長老湊孫時又由得佢地嗰套,一直相安無事互不踩界。一同旅遊,即刻變成長老找錯處之旅:唔可以任由個仔喊(要 keep 住大爺心情靚爆)、唔應該畀佢自己搽牛油 (一定會見血)、衫著太少、水帶唔夠、早餐食太多‧‧‧‧‧‧同長老出遊,好似隨時畀人評估緊咁,阿媽的心情一直處於烏雲密布的陰天‧‧‧‧‧‧

最谷氣的莫過於插手教仔,長老總覺得自己最正確,佢食鹽多過你食米,父母係讀死書教仔,淨識同小朋友講耶穌。當阿媽喺度同仔「講耶穌」時,同行長老直接打斷,親身示範有效教仔方法。激氣!但無奈‧‧‧‧‧‧

雖然同老公堅決表明冇下次同遊 (上次都係咁講),睇返相,長老同阿仔笑到見牙唔見眼的開心時刻,又心軟。

時光真是個壞人,擺酒嗰日,長老邊有咁多白髮,眨下眼腰更彎頭更白,歲月不饒人。我個人冇乜成就,猶幸能在四大長老的晚年,帶畀佢地最大最開心的禮物:一個孫。也慶幸在父母身體尚好時,一同家庭旅行。老人有孫玩,小朋友有長輩錫,能儲下這些快樂時光,畀孩子日後回憶取暖,已是很好很好的事,其他都不重要了。

我係咪咁心胸廣闊唔計較呢?真係咁,就冇呢篇 post 了~喺度發下癲,轉頭又做返唯唯諾諾唔敢駁嘴的家嫂先~

 

圖 / 文:二花

【作者小檔案】

二花:一個鍾意畫畫寫寫搵野忙的媽媽、家務廚藝極需改善的主婦

文字和圖像獲 一個個Onegogo 授權刊登,請勿自行轉載。

 

 


二花

解滯湯水