Home / 人物‧專題 / 人物專訪 / 不一樣的全職爸爸

不一樣的全職爸爸

買餸煮飯、打理家頭細務、湊小朋友…這些以往被視為媽媽在家庭內的工作,現今也可以變成「男主內,女主外」,隨著社會、經濟環境、性別規範轉變,當上全職爸爸不再是天方夜譚。過往報導中的全職爸爸,大多數是因工作佔據了生活,為了不想錯過小朋友成長,想多些時間陪伴家人而選擇放棄工作。當了兩年全職爸爸的Ivan,過去的工作能兼顧家庭生活,他稱當初只是機緣巧合,沒有刻意安排,而他亦有別於其他全職爸爸,他會與其他媽媽打交道,更為關心女兒的教導、能力培養、身理和心理成長等各個方面。

撰文:Heidi 攝影:Jas (FAM101 編輯)

無計劃下當上全職爸爸
Ivan與太太育有一女-妃妃(3歲),一家三口與爺爺嫲嫲同住,女兒由兩老照顧,但本來已退休的爺爺,突然有機會再出社會工作,只剩下嫲嫲一個照顧,有點兒吃力,而Ivan當時由市場策劃轉做廚師約兩年時間,合約尚算自由,與太太及父母商量後,決定當全職爸爸。

對於突然當上全職爸爸,Ivan沒有丁點兒不習慣。「嫲嫲主力負責生活上的照顧,而我唔係傳統型的爸爸,唔係湊返學放學就算,我自己有好多想法,集中想小朋友教育,或是長遠如何發展囡囡的能力。如果係呢類性格的男士,其實很適合做全職爸爸,我認為只是選擇問題,究竟是用自己的分析、計劃能力,投放在事業上還是小朋友身上?喺邊度播種就邊度有收穫,我選擇了妃妃,依家佢成長發展得好好,證明我冇選擇錯。」

「釣魚理論」湊女
做全職爸爸照顧妃妃,雖然得到家人理解,但外人會有很多質疑,甚至會有異樣眼光,Ivan太太有說初時親友都不太明白,「不過同佢哋解釋,漸漸都接受到,就好似當初先生由市場策劃轉做廚師,都令好多人錯愕,但我自己覺得佢想做,而屋企負擔又唔係太大問題,點解唔可以一試?」勇於嘗試這一點,Ivan無形中將此套用在女兒身上,「妃妃自理能力較弱,但如果佢建立咗自信心,佢又可以做得好好,所以我唔會管太多,好多時都放手俾佢試。」Ivan亦坦言父母在照顧小朋友角色上有差別,「媽媽始終有母性,會好保護小朋友,唔想佢受傷,相反爸爸可能冇咁細心,覺得跌下、闖禍、撞板都唔係壞事;又或者整跌嘢落地,媽媽可能會即時鬧,爸爸會覺得冇爛冇所謂啦!」

Ivan指自己從女兒身上領悟到教養的心得,就如釣魚般需要一收一放,「妃妃的個性有點強硬,管太多會適得其反,收反效果,佢會扭計或者喊得好厲害,影響咗佢情緒,反而對件事唔好。就好似你放魚餌出去,條魚咬咗,唔係夾硬扯線返嚟就得,夾硬扯佢會反抗,傷害到條魚之餘,佢亦有機會逃走,所以要收下放下,最尾先會得到收穫。」

與媽媽們成為朋友
最初一個大男人每天接送女兒上PN班,其他媽媽都會有異樣眼光,不過Ivan稱由奇怪到接受的過度期很短,可能與他以往工作上多與陌生人溝通,懂得應對有關。「我解釋媽咪要返工,想小朋友好啲咪自己湊,由返學到依家9個月,同其他媽媽傾多咗偈,講下生活點滴,或者教小朋友的方式,媽媽們都會好認同,加上睇見妃妃咁健康,待人接物態度又好,佢哋都會歸功於我,覺得呢爸爸湊得幾好喎!」後來甚至與媽媽們成為朋友,大家互相交流選擇學校、教養心得等等。

發掘長處加以培養
為了培育女兒,Ivan也有參與parents education課程,「依家普遍家長關心係小朋友夠唔夠能力讀好嘅學校,嚟緊會唔會有好嘅前途,但呢個課程係教育家長要愛小朋友之餘,仲要發掘到小朋友最大的長處,然後給予空間發揮,而唔係為咗配合社會環境而去訓練一個小朋友,催迫佢哋一定要讀好叻嘅小學、中學。」Ivan透過平日與女兒的相處,發現到她語文方面較好,「我哋會同妃妃睇書、講故事,冇刻意要佢認字,但睇多幾次,佢後來自己會認得同讀得出書入面嘅字,我哋都好surprise,將來都希望在這方面發揮所長。」

與家人關係更緊密
Ivan指當全職爸爸最大困難並不在於照顧小朋友,「依家資訊流通發達,即使係新手父母,只要上網查找,都可以得答案,反而是與家人溝通先係最難,如太太與我教育理念不一、又或者與爺爺嫲嫲照顧小朋友方式有出入等等,都會出現爭拗,需要時間磨合。我會代入妃妃嘅角度、眼光、想法去決定方式,但嫲嫲未必會咁諗,佢想妃妃做某些事就會用說話要求佢跟住做,那一刻可能妃妃唔想做,夾硬做效果會較差,而我會先觀察佢嘅心情,如果心情唔好,我會等佢冷靜,先同佢講不如試下咁樣做,聽落感覺唔係迫佢,佢都會願意做。我就會同嫲嫲講呢個方法好啲,初時佢會覺得大家教法唔同,但當佢試過我嘅方法認為好啲,都會跟住做。」Ivan說家人的出發點都是為妃妃好,當中一定有爭拗,但不會過於強硬堅持己見,最終都是選擇對小朋友效果最好的方法,亦可能因為溝通得多,與家人的關係緊密。