Home / 未分類 / 兒童行為治療師葉偉麟:真遊戲?假遊戲?

兒童行為治療師葉偉麟:真遊戲?假遊戲?

十歲男童,就讀本地傳統名牌小學,典型香港忙碌型孩子,星期一至日都充斥着不同類型的「補習班」及「興趣小組」,比成人更忙碌。但最近不斷接獲老師投訴,孩子在課堂上發夢遊魂,成績開始下滑,並承受不了老師指責,開始出現曠課及逃避一切「興趣班」現象。

葉偉麟:著名兒童行為治療師,於英國雪菲爾哈倫大學主修輔導及心理學;著有《父母一句話,啟動孩子解難力》。

 

家長:「同佢做過IQ Test ,肯定佢係資優嘅,佢明明應付到,點解會逃避?」

我:「其實能唔能夠堅持做一件事,未必同IQ直接掛鉤,件事有無趣味性,都會影響佢有冇動機去做嘅。」

家長:「其實佢啲咩班咩班已經用『遊戲形式』去學野㗎啦,咁都覺得無趣味?」

我:「咁你觀察到小朋友平時自己『自由玩』嗰陣,同喺學校或者興趣班利用遊戲『邊學邊玩』有咩分別?」

家長:「……..平時佢自己玩嗰陣梗係可以好專注啦,又會堅持,真係想制止佢都難。如果老師攞張遊戲認字卡出嚟,佢實會瞓着都似!」

我:「即係話佢自由發揮嘅『真遊戲』就會主動啲,但係被安排嘅『假遊戲』就會變成被動甚至放棄?」

家長:「咁冇理由樣樣野都佢話事架?呢個世界唔係圍住你轉㗎嘛。」

我:「教育方案我哋當然好難插手。但如果連令小朋友『保持對學習嘅興趣』初心都無埋;小朋友唔返學,就有機會係學習模式唔適合佢,令佢覺得悶或者自己發揮唔到,而唔係應付唔到。」

家長:「…….」

我:「佢連興趣班都開始逃避,咁我想問吓,其實最初嗰陣係家長嘅興趣?定係小朋友嘅興趣?」

家長沉默,若有所思。

男孩後來到治療室接受治療,他多次不斷小心翼翼把火車軌組成既定的路線,讓「校巴」安全合理地保持在「既定軌跡內」行駛,完全的 Play Safe。

 

我:「我見到你每次都好安全穩陣咁,放架校巴喺路軌上面行,你似乎好鍾意咁樣玩。」

男孩:「其實……我想整條過山車路軌,但係我又怕佢會衝落地下跌爛,然後坐喺校巴裏面啲人死晒!」

孩子的 Naughty Idea, 未必與「生死」有直接關係,反而很大機會他正在表達內心受壓制的價值觀。雖然在既定的軌跡上,但他仍然渴望校巴能夠高速行駛,獲得刺激感,打破沉悶格局。

 

我:「呢個想法好特別,咁不如就整個過山車路軌試吓?」

男孩:「好啊!」

然後我們「夾手夾腳」,一起合作冒險,建造了一個過山車系統,經過不斷反覆失敗嘗試,終於成功讓「校巴」轉型成為「過山車」。

 

我:「估唔到校巴喺半空中嘅路軌都可以高速轉彎!」

男孩:「好刺激啊!好彩我諗到用啲飲筒駁一齊變成啲柱躉先搞掂咋!」

我:「你真係好有工程師嘅頭腦!而且好有創意同冒險精神㖭!」

後來孩子每一次來到治療室,都盡情發揮他無盡的創意及示範作品。例如用簡單的雪條棍組合成飛機滑翔系統;黏土及磁鐵組成煞車系統;…….

 

一年後,家長告知孩子獲得高科技創作大獎,現在已破格晉升德國學府修讀科研。

「真遊戲」過程能夠引發孩子自主學習,真切的成長。

放膽讓孩子「Free Play」「探索」。「軌跡」他們自然會創造出來;真正需要的,只是我們的「支持」!

 

觀看更多育兒資訊請前往 : http://bit.ly/2AhxftR

 

kidscover_3d_1

延伸閱讀:《父母一句話,啟動孩子解難力》葉偉麟、梁婉珊著

電子書試讀 : https://goo.gl/iexJDx